LEGAZPI CITY-Suhestyon kan sarong transport group kay Department of Public Works and Highways (DPWH) Secretary Vince Dizon na mahiling niya an mismong deperensya kan mga lubak-lubak na kakalsadahan orog na sa mga farm-to-market roads sa probinsya kan Sorsogon.
Segun kay Sorsogon Integrated Transport Federation President Ramon Dealca, sa intrevista kan Bombo Radyo Legazpi na dapat mahiling kan kalihim an mga deperensya asin an mga dapat ayuson kan ahensya.
Kasunod ini kan plano kan kalihim na magbisita sa nasabing probinsya ngani mag-inspeksyon sa mga kakalsadahan asin sa Maharlika Highways.
Dapat man suboot na kabale sa inspeksyon an mga farm-to-market roads, mga kalsada pasiring sa Sorsogon to Legazpi asin an pasiring sa Daraga to Villa Hermosa kun sain kadakol an lubak sa mga kalsada.
Dagdag pa niya na dapat malaganan nin mga signage an mga bagong gibong kalsada ngani maibitaran an aksidente.
Nagpapasalamat man an grupo asin naglalaom na mapauswag pa kan ahensya an mga kalsada pasiring sa probinsya kan Sorsogon.
