LEGAZPI CITY- Naghahanda na an lokal na gobierno kan Legazpi City sa mga ipapaotob na lakdang enkasong maitaas pa an alerto kan bulkang Mayon, na presenteng nasa alert level 3.
Enkaso kaya itaas an alert level 4, nangangahuluhan ini na i-ebakwar na an mga residente na nasa 7km extended danger zone.
Segun ki Legazpi City Mayor Hisham Ismail na nakikipag koordinar siya sa barangay officials sa 70 baragay sa ciudad ngani na mapakiolayan an mga ini na ipagamit an saindang rescue vehicles enkasong kinakaipuhan na mag-ebakwar.
Marurumduman kaya na tig-sararo na rescue vehicles an 70 mga barangay sa Legazpi City.
Dugang pa kan alkalde na ipigsugo na ma niya an paghahanda kan limang pasilidad na posibleng gamito bilang evacuation center.
Nagtao na nin direktiba an alkalde na magkondusir nin flashing operations sa mga flooring kan nasabing mga establishimento asin linigan na an mga water tanks.
Segun ki Mayor Ismail na mawot nindang ibitaran na gamiton bilang evacuation center an mga eskwelahan ngani na dae man maulang an pag-aadal kan mga estudyante.
