LEGAZPI CITY-Suminakat na sa walo an numero kan mga nagadan sa pagbagsak kan Binaliw landfill sa Cebu City makalihis na marekober an duwang hawak sa katahawan kan search and rescue operations.
Padagos man na pinaghahanap an 28 pang indibidwal, katuwang an nasa 38 tawohan kan Philippine Army hale sa 525th Engineering Battalion asin CBRN Troops sa operasyon.
Segun kay Councilor Dave Tumulak, may mga structural beam na nakaulang sa lugar kaya naggagamit nin angkop na kagamitan an mga rescuer ngani mahale ini.
Piglinaw man niya na nagtetenir na search and rescue mission an operasyon asin dai pa ini pigkokonsiderang recovery.
Mientrastanto, sinabi ni Mayor Nestor Archival Sr. na dapat mapanimbag an DENR sa mga pagbayolar sa regulasyon katakod sa landfill.
Tinawan-doon niya na dai basta-basta pwedisir ipasarado kan lokal na gobierno an pasilidad huli sa may environmental clearance na ipinaluwa an DENR.
An landfill na pigmamando kan Prime Integrated Waste Solutions Inc. (PIWS), an buminagsak kan Enero 8, na ikinagadan kan mga obrero sa katahawan kan mga reklamo asin patanid hale sa lokal na opisyal.
Dagdag pa kan alkalde, trabaho kan DENR na mangenot sa pag-imbestigar asin pagdedesisyon sa operasyon kan pasilidad.
