LEGAZPI CITY-Target ngonian kan Bureau of Fire Protection na pakaskason an saindang pagresponde sa mga kaso nin kasulo ngonian na bagong taon.
Segun sa Bureau of Fire Protection, ipapaotob ninda an tulos na pagresponde kan mga fire truck sa mga insidente nin kasulo sa laog sana nin limang minuto lalo orog na sa mga lugar na may dakulang populasyon.
Paliwanag ni Bureau of Fire Protection BFP Spokesperson Anthony Arroyo, na doble an paglakop kan kalayo kada 30 segundo.
Huli digdi, an sarong kasulo na nagpoon sa sarong parte kan lugar an posibleng maglakop sa kabilugang area sa laog sana nin 10 minuto.
Dagdag pa ni Arroyo, na saro ini sa mga pangenot na prayoridad kan ahensya ngani maparikas an pagresponde sa mga insidente nin kasulo orog na sa mga matatawong lugar.
