LEGAZPI CITY-Nakapagrehistro nin 1 volcano tectonic earthquake asin 33 rockfall events sa Bulkang Mayon an Philippine Institute of Volcanology and Seismology (Phivolcs) sa nakalihis na duwang aldaw.
Segun kay Resident Volcanologist for Mayon Volcano Deborah Fernandez sa intrevista kan Bombo Radyo Legazpi, na kadakol na mga naobserbaran na rockfall events sa Bulkang Mayon sa enot na semana kan Disyembre.
Nasa 19 rockfall events man an nairehistro sa nakalihis na magdalag asin nagaabot sa labi 10 mga aktibidad sa laog nin sarong aldaw.
Kun magpapadagos asin magabot sa labi 50 mga rockfall events, posibleng isairarom an Bulkan sa alert level 2.
Sa ngonian nagtetenir sa alert level 1 an bulkan asin padagos na pinagbabantayan an mga paghiro kan parameters asin an pag-linog kaini.
Pigmomonitor man ninda an pag-linog kaini huli sa nanotaran an mga rumbling sounds sa may parte kan Anoling sa Camalig Albay.
Pagirumdom kan ahensya na ibitaran an paglaog sa 6km permanent danger zone, mag-ingat sa mga rockfall events asin biglaang phreatic erruptions siring man an pagign vigilant kan mga nakatenir harani sa lahar flow areas.
