LEGAZPI CITY—Mantang ibinaba na sa Alert Level 2 (moderate level of unrest) an Bulkang Mayon, liwat na nagpatanid an Philippine Institute of Volcanology and Seismology (PHIVOLCS) sa volcanic hazards sa laog kan permanent danger zone kan bulkan.
Segun ki Phivolcs Volcano Monitoring and Eruption Prediction Division Chief Mariton Bornas, sa intrevista kan Bombo Radyo Legazpi, na sa ibong na liwat na nagbaba an tsansa na itaas an alerto kan bulkan kun sain nagbalik ini sa parametros na pang-alert level 2 liwat man giraray nindang pigpapaingat an publiko.
Kinakaipuhan man giraray na likayan an pyroclastic density currents o uson, rockfall, peligrosong lahar urog na pag makusog an pag-uuran.
Dugang kaini na mantang bako na kasing ‘urgent’ sa ngunyan kumpara sa nakalihis na semana urog na kan Agosto 17 na nag-abot sa 8,393 tonelada kada aldaw an ibinugang sulfur dioxide o an may posibilidad na pagputok kan bulkan, ipigdoon kan opisyal na dae dapat magin kampante.
Magigiromdomang ibinaba sa Alert Level 2 an bulkan kan Agosto 5, asin segun sa ahensyan dae man giraray pigsuhestiyon an paglaog sa permanent danger zone partikularmente sa timog asin sirangang parte kan bulkan.
