LEGAZPI CITY-Padagos an pagkondusir kan Daraga Municipal Police Station nin oplan bandilyo sa saindang lugar mapadapit sa mga posibleng kawatan asin sa pag-likay sa paggamit nin mga paputok.
Segun kay Daraga Municipal Police Station Chief of Police Police Lieutenant Colonel Edgar Azotea, sa intrevista kan Bombo Radyo Legazpi, na naglilibot sinda asin nagsasagibo nin bandilyo gamit an megaphone bilang abiso sa gabos na mag-ingat sa mga mandarambong sa panahon na ini.
Saro ini sa saindang paagi ngani magpagirumdom sa mga residentes na ingatan an saindang mga gamit siring kan bag, cellphone, o mga alahas.
Mahigot man na pinapatanidan an mga nagsasaud na dai na magtaong tsansa sa mga kawatan siring kan pagsulot nin mga alahas.
Abiso man kan opisyal na enkaso masaud, ilaag sa inot kan saindang lawas an bag bako sa saindang likudan, dai ipaglaog an cellphone sa saindang mga bulsa, asin magdara sana nin bastanteng kwarta.
Mientrastanto, mahigot man an saindang kampanya laban sa paggamit nin iligal na paputok.
Pigenganyar kan opisyal an mga magurang na dai na pagtawanan an saindang mga aki nin pambakal kan anumang klase nin paputok.
Nangangapudan man an otoridad manungod sa paggamit kan alternatibong mga kagamitan bilang pamparibok sa pagsabat kan Bagong taon.
