LEGAZPI CITY – Ikinamundo kan grupo nin mga paraooma an padagos na pagtaas kan presyo kan mga pangenot na babarakalon sa nacion sagkod sa pagtatapos kan taong 2025.
Segun ki Bantay Bigas Spokesperson Cathy Estavillo sa intrevista kan Bombo Radyo Legazpi na pigbabasol ninda an gobierno huli sa mabantol na aksyon nganing dae malugi an mga paraooma sa pagpapabakal kan saindang mga produkto.
Kalimitan kaya suboot na nangyayari na mga trader an nagbabakal kan mga produkto sa mga paraooma sa hababang presyo asin pigpapatungan nin halangkaw na presyo pag-abot sa merkado na naipapasa an gabat sa mga konsumidores.
Punto niya na bilang agricultural country, dapat pig-aasigurar kan gobierno an mga post harvest facility nganing may mabubutakan an mga paraooma kan saindang agricultural product tuyong peak season nganing malikayan an labing pagtaas kan presyo kan mga ini.
Piglinaw pa kan opisyal na dae nakakakuwa nin halangkaw na ganansya an mga paraooma ngonian na holiday season huli ta trader an nagmomonopolyo kan mga prudukto urog na an mga pigtitienda sa palengke.
Suhestyon niya man na bakalon na sana kan gobierno an mga agricultural products kan mga paraooma nganing mapanatag man an saindang boot huli ta syerto an halangkaw na ganansya asin nalilikayan an pagkalugi asin nagigin abot kaya an mga presyo kan mga babarakalon sa palengke.
Ipighayag pa ni Estavillo na nagpapadifisil man sa mga paraooma sa presenteng panahon an pagmimina sa kabuludan, land use convertion, reclamation, asin an warang patod na importation sa mga produktong igwa an nacion.
