LEGAZPI CITY-Inaresto kan pulisya an tulong lalaking nakasulot nin balaclava o takop sa pandok na may sulog na vest na may markang “PRESS” mantang nangyayari an protesta sa Maynila kasabay kan Trillion Peso March rally.
Segun sa inisyal na report kan pulisya, napansin an 3 indibidwal bandang harani sa Plaza Salamanca sa Kalaw Avenue.
Tulos na pigranihan kan mga awtoridad an mga ini makalihis mapansing may takop an saindang mga pandok na mahigot na ipinagbabawal sa irarom kan bagong ordinansa kan ciudad kan Maynila.
Dinara an mga ini sa presinto ngani kwestyunon asin beripikahon an saindang pagkakakilanlan.
Sinabi man ninda na contributors sinda kan KS21 page, na may koneksyon sa grupong “Kilusang Setyembre bente uno.”
Iniladawan ninda an grupo bilang sarong freelance media outfit na suportado kan dai man pinangaranang non-government organization (NGO).
Basado man sa page kan Kilusang Setyembre Bente Uno, an nasambitang grupo an sarong youth coalition asin NGO na nagtataguyod kan mga adbokasiyang pro-accountability, anti-corruption asin pro-Philippines.
Kasunod kaini, padagos na pigbeberipika kan mga awtoridad an tunay na pagkakakilanlan kan 3 indibidwal na suboot may koneksyon sa pigsasabing grupo kan medya.
