LEGAZPI CITY-Kinumpirma kan Pamahalaang Lungsod kan Maynila an tulong bagong kaso kan COVID-19 basado sa pinakahuring report kan saindang monitoring sa Water and Food-Borne Diseases, Influenza-Like Illnesses, Leptospirosis, asin Dengue o an pigaapod na (W.I.L.D.) diseases.
Huli digdi, uminabot na sa 60 an kabilugang kumpirmadong kaso kan COVID-19 na nairehistro sa ciudad poon Enero 1 hasta sa presenteng bulan.
Afuera sa COVID-19, nakapagrehistro man an city government nin tulong kaso kan dengue, rason ngani magsakat sa 1,961 na kabilugang numero kan mga kaso kan helang an igwa sa Maynila ngonian na taon.
Sarong bagong kaso man kan leptospirosis an nairehistro kan Hulyo 16, na nagdara nin kabilugang numero na 94 ngonian na taon.
Mientras tanto, wara naman nin nairehistrong bagong kaso kan iba pang W.I.L.D. diseases na pigsasairarom sa urualdaw na monitoring kan pamahalaang lungsod.
Alagad, nagtetenir an kabilugang numero kan mga kaso kan influenza-like illnesses (ILI) sa 773, severe acute respiratory infections (SARI) sa 240, typhoid fever sa 57 asin tulong kaso kan cholera.
Katakod kaiini, liwat na nagpagirumdom an Manila Health Department (MHD) sa publiko na padagos na mag-ingat laban sa mga W.I.L.D. diseases, orog na ngonian na panahon nin tag-uran.
