Nagluya sa 2.1 porsyento an paglago kan Gross Domestic Product (GDP) kan Pilipinas sa ikatolong kwarter kan 2026 huli sa pag-urong kan sektor nin agrikultura asin industriya sa ibong kan padagos na pag-angat kan services sector.
Segun ki National Statistician Claire Dennis Mapa, ini an pinakahababang nairehistro puon kan enot na kwarter kan 2021 sa tahaw kan pandemya, asin kun dai isasabay an panahon kan COVID-19, ini na an pinakamaluyang paglago kan ekonomiya kan nacion puon pa kan huring kwarter kan 2009.
Huli kaini, sinabi kan Department of Economy, Planning and Development (DEPDev) na malabong maabot kan nacion an binawasan na target na 3.5 sagkod 4.5 porsyento na paglago ngonian na taon, kun sain sinabi ni DEPDev Secretary Arsenio Balisacan na kaipuhan na maglago nin 6.3 porsyento an GDP sa ikaapat na kwarter ngani makaabot sa pinakahababang parte kan target.
Tinawan-doon kan Philippine Statistics Authority (PSA) na an services sector an pangenot na nagsuporta sa ekonomiya makalihis ini maglago nin 3.7 porsyento, mantang buminagsak nin 4.8 porsyento an agrikultura asin nagluya nin 0.003 porsyento an industriya kasabay kan pag-urong kan public construction sa ikaanom na sunod-sunod na kwarter.
Nakaapektar nin maray sa ekonomiya kan nacion an halangkaw na presyo kan langis asin barakalon huli sa giyera sa Middle East, pati an epekto kan mga nakaaging kalamidad asin kontrobersiya sa pampublikong paggastos na nagpababa sa tiwala kan mga negosyante asin konsumidor sa nacion.
