Ipigdoon kan mga organizer kan “Trillion Peso March” na dae matutok an hiro protesta ngonian na aldaw sa pagkakabahagi kan politika sa nacion kundi sa pangenot na obheto kaini an paglaban sa sistemikong korapsyon sa gobierno.
Segun ki Kiko Aquino Dee, saro sa mga organizer asin makuapo ninda Cory asin Ninoy Aquino, na dae sinda pabor o kontra sa anumang opisyal.
Pagdoon kaini an pangenot na pangapodan kan rally an transparency, pagbabalik kan kwarta, pagrespeto sa 1987 Konstitusyon, asin paglaban sa mga dinastiya.
Binanggit man niya na sa presente solamenteng mga kontratista asin dating mga engineers kan Department of Public Works and Highways sana an naarestar asin nakulong.
Dugang niya mawot nindang mahiling an pag-arestar sa mga haralangkaw na opisyal na imbuelto sa korapsyon nganing ipahiling sa publiko na warang ‘sacred cows’ sa imbestigasyon.
Nilinaw man ni Dee na an mga madara nin placard na naghahagad nin pagpapabutas ki Presidente Marcos an dae pakikiaraaman basta dae nakakaistorbo.
Alagad segun saiya kun maporbar na maghikayat nin extra-constitutional actions, siring kan pagtanggal nin suporta kan Sandatahang Lakas, an ini pagbalgar sa patakaran.
