LEGAZPI CITY – Preparado nang ipa-otob kan Pioduran Municipal Disaster Risk Reduction and Management Office an saindang contingency plan enkaso maka-apektar na sa saindang banwaan an pigbabantayang si Bagyong Verbena.
Segun ki Pioduran MDRRMO Head Noel Ordoña sa intrevista kan Bombo Radyo Legazpi na nakatalaan man sindang makipag-olay sa National Disaster Risk Reduction and Management Council nganing paghandaan an nasabing raot nin panahon huli ta maski harayo pa ini sa kadagaan an pwedesir na magbago pa an track kaini.
Katakod kaini an ipapa-alerto man ninda an saindang Barangay Disaster Risk Reduction and Management Committee partikulamente na sa mga lugar na permihang nakakamate nin pagbabaha asin landslide tuyong igwa nin kalamidad.
Makikipagkoordinar man sinda sa Philippine Coast Guard mapadapit sa posibilidad na pagsususpendir kan mga byahe kan barko sa Pioduran Port urog nang kabale an provincia kan Masbate sa Tropical Cyclone Wind Signal.
Pigtaram pa kan opisyal na nagsasagibo man sinda nin de-clogging an mga drainage system nganing maibitaran an pagbabaha asin trimming sa mga marambong na kahoy nganing dae magtumba enkaso kumusog an pag-uuran asin paros.
Dae man ninda pighahale an posibilidad na i-ebakwar an maabot na 300 pamilya kan kan Sitio Lagaan, Barangay Banawan urog nang napapalibutan ini nin salog asin dagat na delikado tuyong maraot an panahon.
Pigbabantayan man ninda an sitwasyon sa Pioduran Memorial District Hospital asin nakahandang ilipat an mga pasyente sa pigkokonstruhir na bagong hospital huli ta piglalaog ini nin tubig-baha.
Pagdoon pa ni Ordoña na may naka-preposition na sindang family foodpacks sa ibong kan pagtama kan mga nakaaging bagyo mantang nakikipagkoordinar na man sinda sa Gobierno Provincial, Department of Social Welfare and Development asin iba nganing dugangan an saindang supply.
