LEGAZPI CITY-Pormal nang isinangat kan Office of the Ombudsman an saindang enot na kaso sa Sandiganbayan na may kinaaraman sa mga anomalyadong flood control projects.
Makalihis an duwang bulan na imbestigasyon, pagtipon nin mga ebidensya asin testimonya, pig-anunsyo kan Ombudsman an saindang resolusyon na magsangat nin kasong kriminal laban sa nagkapirang indibidwal na imbuelto sa kontrobersiya.
Segun ki Assistant Ombudsman Mico F. Clavano, nagsangat sinda nin kaso kriminal laban ki dating Ako Bicol Party-list Rep. Zaldy Co, nagkapirang opisyales kan Department of Public Works and Highways kan Region IV-B, asin magin sa board of directors kan Sunwest Corporation.
Partikular na sa mga kasong isinangat sa Sandiganbayan, iyo an Malversation of Public Funds through Falsification of Public Documents asin sarong pagbayolar sa Section 3 kan Republic Act 3019 o Anti-Graft and Corrupt Practices Act.
Mientras tanto, sarong separado asin dagdag na kaso an isinangat laban kay Zaldy Co huli suboot sa pagbalgar sa Section 3(b) kan RA 3019 siring man sa pag-ako nin ‘unwarranted financial’ o ‘pecuniary benefits’.
An kaso may koneksyon sa flood control project na konstruksyon kan Road Dike sa “Mag-Asawang Tubig River”sa Naujan, Oriental Mindoro.
Susog digdi, ipigheras man ni Assistant Ombudsman Clavano an rekomendasyon kan Panel of Ombudsman prosecutors na dae tutugutang makapagpiyansa si dating Ako Bicol Party-list Rep. Zaldy Co.
