LEGAZPI CITY—Matrayumpong na-dismantle kan mga otoridad an sarong aktibong drug den asin naarestar an apat na high-value individuals sa ikunundusir na High Impact Operation sa Barangay Mahayahay, Cawayan, Masbate.
Binisto an mga suspek na sinda alyas “Remuel”, 34-anyos, lalaki, residente kan Barangay Pawican, Cataingan; alyas “Sammy”, 20-anyos, lalaki, residente kan Barangay Sto. Cristo, Uson; alyas “Gilbert”, 36-anyos, lalaki, residente kan Barangay Recodo, Cawayan; asin alyas “Jesma”, 44-anyos, lalaki asin residente man kan Barangay Recodo, Cawayan.
Gabos na nasabing suspek an binisto bilang High-Value Individuals na nadakop sa aktong pagpapabakal asin paggamit nin ilegal na droga.
Narekober sainda an nasa 8 gramos nin pigtutubudang shabu na may kantidad P54,400 kaiba an manlaen-laeng drug paraphernalia na kalimitang piggamit sa operasyon kan drug den.
Naarestar an mga suspek sa pinagsarong operatiba kan Cawayan Municipal Police Station, Philippine Drug Enforcement Agency Masbate Provincial Office bilang lead unit kaiba an Provincial Intelligence Unit and the Provincial Police Drug Enforcement Unit, 502nd Maneuver Company Regional Mobile Force Battalion 5 asin Regional Special Operations Unit.
Nasa kustodiya na kan Cawayan MPS an mga suspek asin nakumpiskar na ebidensya para sa magkakanigong disposisyon asin pagsunad nin kaso sa irarom kan Sections 5, 6, 7, 11, asin 12 kan Republic Act 9165 o Comprehensive Dangerous Drugs Act of 2002.
Mantang an mga nakuang drug items an dadarahon sa Masbate Provincial Forensic Unit para sa qualitative asin quantitative examination.
