LEGAZPI CITY-Pigtuturong rason kan water interruption sa ciudad kan Legazpi an kawaran nin kuryente asin danyos sa pumping stations sa nagkapirang barangay basado sa pagbusisi kan Legazpi City Water District.
Segun ki Legazpi City Water District General Manager Rico Salazar sa intrevista kan Bombo Radyo Legazpi, na bago pa man an pananalasa kan bagyo an nagsagibo na sinda nin aktibong inspekyon asin nakastandby man an saindang team kun sain pigisyuhan an publiko mapadapit sa nasabing water interruption.
Inabisuhan man suboot an gabos na magtipon nin tubig asin iasigurar an saindang mga pumping stations.
Basado sa monitoring sa mga pasilidad kan nagkapirang barangay, an nagkaigwa nin danyos sa nagkapirang pumping stations kun sain dai muna magamit an mga pump asin presenteng naggagamit nin mga generators.
Kairiba sa mga pumping stations na kinakaipuhan nin suplay nin kuryente an Barangay Taysan, Bonga, Mabinit, Binanuahan asin iba pa.
Nanotaran man suboot an ‘sand build up’ sa nagkapirang pumping stations kun sain kinakaipuhan man nin ‘desilting’ huli sa nakalihis na mga paguuran.
Sa presente an pig-eenot kan ahensya an mga kinakaipuhan ayuson na mga stations orog na sa mga hararani sa ospital.
Nakikipagkoordinar naman sinda sa PHILHydro asin sa ALECO ngani maisaayos an mga pumping stations asin maibalik na an elektrisidad sa nagkapirang mga barangay
