Ipigsunad kan Office of Public Counsel for Victims (OPCV) kan International Criminal Court (ICC) an rekomendasyon kan duwang eksperto sa neuropsychology na mabilog sa bagong panel na mahiling sa mental health ni dating Presidente Rodrigo Duterte nganing maaraman kun karapat-dapat ba ining humampang sa paglilitis.
Sa limang-pahinang dokumentong isinunad kan Nobyembre 10, 2025, sinabi ni Paolina Massidda, Principal Counsel kan OPCV, na an duwang inirekumendang mahiling kay Duterte an may supisyenteng credentials asin eksperyensya.
Segun pa sa OPCV, pinili ninda an mga eksperto basado sa saindang kwalipikasyon asin kakayanan, kabale an pagigin bihasa sa ingles asin sa lingwahe kun saen nakasurat an pirang naenot na medical findings ni Duterte.
An ICC an dati nang nagdesignar nin tulong miyembrong panel na kompwesto kan sarong forensic psychiatrist, neuropsychologist, asin eksperto sa geriatric asin behavioral neurology.
Gayunman, pighagad kan kampo ni Duterte na tanggalon an saro sa sa mga eksperto huli sa suboot kakulangan nin eksperyensya asin posibleng kawaran kan impartiality kaini.
Sa mosyon kan Nobyembre 7, ipigdoon ni Atty. Nicholas Kaufman, lead counsel ni Duterte, na dapat bawion kan Pre-Trial Chamber an mandato kan nasabing eksperto asin dae na ini tugutang mapabale sa listahan kan ICC experts.
Huli kaini, pigsugo kan Pre-Trial Chamber I an Registry na magsumite nin bagong shortlist nin mga neuropsychology experts.
Sa suway na dokumento man kan Nobyembre 10, sinabi pa ni Massidda na ipauubaya ninda sa Chamber an pinal na desisyon, alagad ipigdoon na dapat may neuropsychologist sa panel nganing masyerto an patas na pagsusuri sa kamugtakan kan dating Presidente.
Magigirumdumang inarestar asin dinara si Duterte sa The Hague kan Marso 12, asin huring nahiling sa sarong teleconference kan Marso 14.
Naantala an saiyang confirmation of charges hearing na orihinal na ipigbugtak kan Setyembre 23, makalihis idoon kan saiyang mga abogado na siya an bako na fit to stand trial huli sa suboot pagluya kan saiyang cognitive abilities.
 of the International Criminal Court (ICC) has rejected the recommendation of two neuropsychology experts to form a new panel to look into the mental health of former President Rodrigo Duterte to determine whether he is fit to stand trial.){kind=link}