LEGAZPI CITY—Nagpepreparar na an lokal na gobierno kan Pio Duran, Albay sa pagpapa-ebakwar sa namamanwaan sa lugar huli sa posibleng epekto kan bagyong Uwan.
Segun ki Municipal Disaster Risk Reduction and Management Office Pio Duran Head Noel Ordoña, sa intrevista kan Bombo Radyo Legazpi, kabale sa saindang ipigpapa-ebakwar an mga pasyente sa hospital sa saindang banwaan, mga residentes na naka-istar harani sa dagat asin mga nasa flood-prone areas, magin an mga naka-istar sa harong na gibo sa light materials.
Pigtawan-doon man kan opisyal na an mga barangay officials an dapat na magin hands on sa saindang nasasakupan asin dapat ma-ipaotob an magkakanigong lakdang nganing maibitaran an casualty sa nasabing raot kan panahon.
Mientrastanto, pigpapagiromdoman man ni Ordoña an mga namamanwaan kan Pio Duran na magsunod sa abiso kan mga otoridad para man sa saindang kaligtasan.
