LEGAZPI CITY – Nagpapa ‘reserve’ na nin espasyo sa Barangay Hall an mga residentes kan Brgy. Cabagñan West, Legazpi City bilang preparasyon sa posibleng epekto kan bagyo na may international name na “Fung-wong”.
Segun ki Punong Barangay Rowena Olimpo sa intrevista kan Bombo Radyo Legazpi na nagpareserba na an nagkapira sa saindang mga residentes nganing marikas sindang makapag-ebakwar enkaso maghagupit sa provincia kan Albay an nasabing raot nin panahon.
Bilang saro sa mga barangay na permihang pigbabaha an nagsusurunod na an saindang mga residentes enkaso magsagibo na sinda nin pre-emptive evacuation mantang may mga harong man na nagpapadagos sa saindang kataraid.
Maski suboot mga residente an dae pighahalat an abiso kan City Disaster Risk Reduction and Management Office nganing mag-ebakwar.
Pigtaram pa kan opisyal na dae man niya pigpupugulan asin kan saindang mga konseho an mga residenteng nagpapareserba na nin espasyo.
Maabot man sa 150 pamilya an pwedesir na i-akomodar kan saindang Barangay asin multi purpose hall mantang an iba man an pigdadara sa mga evacuation center na ipigdesignar kan lokal na gobierno.
Padagos man an saindang abiso na sa mga residenteng ma-ebakwar na syertuhon na naka-lock an saindang mga kaharongan antes magpasiring sa evacuation centers nganing malikayan na maanod ini kan tubig-baha.
Pagirumdom ni Olimpo sa saindang nasasakupan na enkaso makusugon na an pag-uuran an dae na magduwang isip na mag-ebakwar nganing malikayan an anumang huma sa saindang buhay.
