LEGAZPI CITY – Padagos na nagtatao nin asistensya an mga Daraga Municipal Police Station sa mga nagpapasiring sa mga sementeryo ngonian na aldaw katakod kan pag-obserbar kan Undas.
Segun ki Daraga Municipal Police Station Chief of Police Police Lieutenant Colonel Edgar Azotea sa intrevista kan Bombo Radyo Legazpi na nakadeploy na an saindang mga personahes poon pa kan nakaaging Oktubre 30 asin 24/7 sindang mabantay sa mga kamposanto asin madurar sagkod sa Nobyembre 2 o hangga’t may tawo pang nagbibisita sa mga puntod.
Mahigot man nindang pigbabantayan an mga maralaog sa Binitayan Catholic Cemetery na saro sa mga pinakadakulang sementeryo sa banwaan urog nang irigwa nin mga prominenteng mga personalidad na nakalubong na syertong dadagsaon kan saindang mga supporters.
Base man sa ipinaluwas na executive order an ipinagbabawal man ninda an pagdadara nin mga bladed weapons huli ta tapos na kasuhapon an itinalaang aldaw para sa paglilinig asin pagpipintura kan mga puntod kan saindang namaaram nang padangat sa buhay.
Pigtaram pa kan opisyal na dae man pwedesir ilaog sa mga kamposanto an mga badil urog na kun bako man uniformed personnel o bako otorisadong magdara nin mga fire-arms, mga arak, asin sound system huli ta an Nobyembre uno an aldaw kan pagrumdom sa mga nagadan bako mang-isturbo nin iba.
Pig-obliga man suboot an mga cemetery-goers na magdara nin kaniya-kaniyang laugan kan saindang mga basura partikulamente na an may mga dara nin pagkakan nganing pagkatapos kan undas an dae man magin basurahan an mga sementeryo.
May mga nakasuway man na mga designated na agihan para mga lalaki, babae, senior citizen asin Persons with Disabilities nganing matawan nin prayoridad an mga dapat tawan asistensya kan mga kapulisan.
Pangapodan ni Azotea sa mga mapasiring sa mga kamposanto na syertuhon na salbado an saindang mga harong laban sa mga presensya kan mga kawatan asin sa kasulo mantang dae pagdarahon sa tinampo an init kan payo nganing malikayan an aksidente.
