LEGAZPI CITY – Madali nang maresolbaran kan Provincial Government an nagigin kawsa kan mga serye nin pagbabaha sa Barangay Masarawag, Guinobatan, Albay.
Segun ki Albay Provincial Administrator Raul Rosal sa intrevista kan Bombo Radyo Legazpi na base sa inspeksyon na ginibo kan Albay Public Safety and Emergency Management Office (APSEMO) na an luho sa sarong dam na pigkonstruhir kan taong 1980’s pa an nagigin kawsa kan pagbabaha sa nasabing barangay tuyong nag-uuran.
Natukar man sa ginibong Ulat sa Bayan ni Governor Noel Rosal na aalokaran ninda nin magkakanigong pondo an pagsasagibo nin panibagong dam nganing ma-proteksyunan an publiko sa mga nagbababa na tubig sa mga gully kan bulkang Mayon.
Afuera kaini an nakatalaan man nindang hilingon kun may mga natakluban na mga dating drainage system an river-channel na harani sa naunambitang barangay nganing mabawasan an epekto kan mga flash floods.
Pigtaram pa kan opisyal na pig-aadalan man ninda kun may kinaaraman an quarry sa mga serye kan pagbabaha sa Barangay Masarawag alagad sa presente an wara sindang nahiling base man sa saindang inspeksyon.
Pagdoon man ni Rosal na kun maisasakatupadan na an gigibuhon nindang lakdang an digdi mahihiling kun supisyente na an mga ini nganing masulusyunan an numero unong problema kan mga residentes tuyong maraot an panahon.
