LEGAZPI CITY – Puga-puga na man an preparasyon kan Bureau of Fire Protection mapadapit sa nagdadangadang na pag-obserbar kan Undas ngonian na taon.
Segun ki Albay Provincial Fire Marshal Fire Superintendent Jerickson P. Miraflor sa intrevista kan Bombo Radyo Legazpi na katakod kaini an pigpunan na ninda an saindang “oplan undas” kun sain idedeploy an saindang personahes sa manlain-laing parke asin sementeryo nganing magtaong tabang asistensya sa publiko.
Makondusir man sinda nin mga inspeksyon sa mga kamposanto nganing mamantenir an pazy orden sa kabilugang durasyon kan Undas.
May mga nakaposte man na mga emergency medical services sa Oktubre 31 asin Nobyembre 1 nganing tulos na makaresponde enkaso magkaigwa nin medical emergency sa bisinidad kan mga sementeryo urog nang piglalaoman ninda an pagruso nin mga tawo.
Pigtaram pa kan opisyal na may ma-standby man na mga firetruck sa mga darakulang sementeryo para man sa dae piglalaomang kasulo nganing marikas sindang makapagresponde sa kasagsagan kan undas.
Base man sa saindang obserbasyon kan undas kan nakaaging taon an kadaklan sa natawan nindang asistensya iyo an mga nawawaran nin malay sa katahawan kan pagbisita ninda sa saindang mga namaaram nang mahal sa buhay kun kaya plano ninda na magdara nin Blood pressure apparatus para sa mga mawot maaraman an saindang BP antes magpasiring sa laog kan kamposanto.
Pagdoon niya man na antes maghale sa saindang mga kaharongan an syertuhon man muna suboot na may mawawalat nganing magreparo kan mga bagay na pwedesir punan nin kasulo asin nganing maibitaran an pagigin biktima kan mga akyat-bahay.
Pagirumdom ni Miraflor sa publiko na amay nang magbisita sa saindang namaaram na mga mahal sa buhay urog na kun may kamatean nganing malikayan an pagruso kan mga tawo sa manlain-laing kamposanto.
