LEGAZPI CITY-Nagsangat an Department of Trade and Industry (DTI) nin mga pormal na reklamo laban sa walong kontratista na imbuelto suboot sa iskandalo sa flood control projects.
Segun sa ahensya, an mga reklamo an isinangat sa irarom kan Executive Order No. 913 (1983) asin iba pang ley sa pangkalakalan, huli sa posibleng pagbayolar sa construction industry regulations kan mga kontratista.
Kairiba sa mga pinangaranang kontratista an nagkapira sa top 15 firms na suboot nag-korner nin 20% na P545-bilyong flood control contracts, susog sa pahayag ni Presidente Ferdinand “Bongbong” Marcos Jr.
Kairiba sa mga sinangatan nin kaso an minasunod:
- Legacy Construction Corporation
- Centerways Construction & Development Inc.
- Alpha & Omega General Contractor & Development Corp.
- MG Samidan Construction
- L.R. Tiqui Builders Inc.
- QM Builders
- EGB Construction Corporation
- Hi-Tone Construction & Development Corp.
Segub kay Trade Secretary Cristina Roque, isinangat an mga reklamo sa Philippine Contractors Accreditation Board – Monitoring and Enforcement Division (PCAB-MED), na siyang nag-iimbestigar sa mga pagbayolar kan mga kontratista.
Dagdag pa kan ahensya,pwedisir suspindehon an lisensya kan mga imbuelto mantang nagpapadagos an imbestigasyon.
Afuera sa walo, walo pang kontratista an nakatakdang masangat nin reklamo, kaiba an Triple 8 Construction & Supply, Topnotch Catalyst Builders, Sunwest Inc., asin Road Edge Trading & Development Services.
Pigsierto man kan DTI na nagpapadagos an fact-finding investigation sa pakikipag-koordinar sa Independent Commission for Infrastructure (ICI) ngani mamantenir an transparency asin accountability sa mga proyekto kan gobierno.
