LEGAZPI CITY – Nasa maray nang sitwasyon ngonian an munisipalidad kan Gubat sa provincia kan Sorsogon sa ibong kan pag-land fall sa saindang lugar ni Bagyong Ramil.
Segun ki Gubat Municipal Disaster Risk Reduction and Management Office Head Rhalen Endeno sa intrevista kan Bombo Radyo Legazpi na dae ninda namatean na sa saindang banwaan palan nairehistro an enot na pagland-fall kan nasambitang bagyo huli ta maluya sana an ibinagsak kaining uran.
Ipigpasalamat niya man garing bako bagyo suboot an nag-agi sa saindang lugar huli ta bako makusog an duros kan paros mantang wara man sindang nairehistrong pagbabaha sa nakalihis na magdamlag.
Wara man sa saindang mga residentes an nagtenir sa mga evacuation centers sa kasagsagan kan pagland-fall ni Ramil ini an sa ibong kan saindang ipigtaong abiso bilang parte kan saindang pre-emptive measures.
Pigtaaram pa kan opisyal na maski bako kakusugan an nagin epekto ni Bagyong Ramil sa banwaan kan Gubat an nagin puga-puga man an saindang preparasyon kabale na an pagbandera nin heightened alert status kan saindang emergency operation centers.
Wara man nin patod an saindang koordinasyon sa manlain-laing law enforcement agencies nganing masyerto an kaligtasan kan saindang nasasakupan sa panahon kan pag-agi kan bagyo sa rehiyon Bikol.
Pangapodan ni Endeno sa publiko na sa mga siring kaining panahon nin kalamidad an dapat permihang magin handa asin magsunod sa mga abiso kan mga otoridad.
