LEGAZPI CITY—Padagos na pig-iimbestigaran kan mga otoridad an nangyaring paninigbas sa sarong bumbero mantang nagreresponde sa sarong kasulo sa Barangay Bangate, Barcelona, Sorsogon.
Segun ki Barcelona Fire Station Chief Public Information Section Fire Officer 1 Mary Grace Licup, sa intrevista kan Bombo Radyo Legazpi, pagsakat kan nasabing persona sa nasusulong bisinidad an bigla na sana ining tinigbas kan may kagsadiri kan harong gamit an bolo.
Tulos man ining nirespondehan kan kapwa bumbero asin dinara sa pinakaharaning ospital.
Segun sa opisyal na nagsapar an biktima nin laceration sa saiyang lawas.
Dugang ni Licup na dae man ninda bisto maski kan biktima an nanigbas na persona.
Sa presente, nagpapadagos an imbestigasyon kan kapulisan sa nasabing insidente.
Siring man, nakapagsunad na sinda nin kaso laban sa suspek.
Mientrastanto, pagiromdom kan opisyal sa mga residente na likayan an makiaram o mag-ulang sa trabaho kan saindang personahes urog na pag may respondehan siring kan kasulo.
Pigdoon man kaini na yaon sinda nganing magtabang asin protehiran an buhay asin pagrugaring kan namamanwaan.
