LEGAZPI CITY – Padagos an pigsasagibong wheel-clamping operation kan Public Safety Office sa ciudad kan Legazpi.
Segun ki Legazpi City Public Safety Office head Octavio Rivero sa intrevista kan Bombo Radyo Legazpi na katuyuhan kan operasyon na magserbing patanid sa iba na punduhan na an pagiging pasaway sa mga kakalsadahan asin ibitaran an illegal parking.
Marikas man sindang nagtatao nin aksyon sa mga reklamo kan mga kagsadiri kan mga establisyemento asin mga residentes mapadapit sa mga pasaway na mga driver na nakaparada an saindang behikulo sa bako otorisadong parking area.
Pigtatawan man suboot ninda nin konsiderasyon an ibang nakiki-olay sainda kun sain pigtatanggal ninda an clamp asin pigtatawan na sana nin ticket nganing maka-uli man an mga ini sa saindang mga lugar.
Pigdugang pa kan opisyal na basado sa saindang datos an nagpapakol sa 30 behikulo kada aldaw an saindang naka-clamp huli sa pagbayolar sa mga ley trapiko mantang pigtatawan man ninda nin limang minuto an kada driver na tanggalon an saindang behikulo an ika-clamp na ninda ini.
Pangapodan man ni Rivero sa mga kagsadiri nin mga behikulo na ibitaran an pagpark sa mga ipinagbabawal na lugar asin dae dapat magraot an boot enkaso natawan sinda nin violation huli ta nagsusunod man sana sinda sa saindang mandato.
