LEGAZPI CITY-Padiit-diit na suboot na nakakasabay an Lipata Integrated School sa isla kan Caramoan North District sa mga inobasyon sa lado kan edukasyon.
Segun kay Caramoan North District Lipata Integrated School Head Wendel Alvarez, sa intrevista kan Bombo Radyo Legazpi na nagin integrated school na an nasabing eskwelahan sa isla kan Hunyo asin sa ngonian an nasa 285 na an mga estudyanteng nakakapag-adal digdi kasabay an sekondarya kumpa kan dating nasa 48 na mga estudyante sana poon kinder hasta grade 2.
Dagdag pa ni Principal Alvarez na bilang saro siya sa proponent, an “very overwhelmed” siya huli sa suporta kan DepEd officials asin non-government organizations ngani maipaotob an pangaturugan kan mga estudyante na magkaigwa nin highschool sa isla.
Parte man suboot sa rason kun nata nagmawot sinda nin sekondarya sa lugar huli sa haros 3 oras an piglalakaw kan mga aki asin komplikado ini sa saindang learnings.
Laoman man kan opisyal na mahiling kan gobierno an pagkakaigwa nin higsh school sa mga lugar na igwang kaparehong sitwasyon sa saindang isla.
Mawot man kan principal na makapag-hatod nin inspirasyon sa sainda orog na sa masunod pang mga teachers na mag-self giving sa serbisyo sa mga namamanwaan.
Nagpapasalamat man siya sa simpleng programa na saiyang ipinabisto na nagin paagi ngani magdakol pa an tabang na ipinapanao kan saindang mga partners sa komunidad.
Pinakadakulang development man suboot sa saindang isla an pagkakaigwa nin kuryente kan 2002 kun sain nagpoon na an pag-access ninda sa internet, free wifi, asin paggamit sa mga computer equipment para sa halangkaw na kalidad kan edukasyon sa lugar.
Afuera digdi, an nagin mas magayon man suboot an kabuhayan kan mga namamanwaan huli sa nakakapaggamit na sinda nin refregirator sa pagtipon nin mga sira.
