Ipigkokonsidera ni dating Independent Commission for Infrastructure special adviser asin presenteng Baguio City Mayor Benjamin Magalong na sarong matinding insulto sa kaisipan kan mga Pilipino an paglaladawan sa pagbubutas ni dating Cong. Zaldy Co bilang sarong “sakripisyo” imbes na pagtakas o pagtalikod sa saiyang mandato.
Sa pagdangog sa Senado, napasabi na sana nin “My God” si Magalong makalihis ipahiling na dae suboot binayaan ni Co an saiyang posisyon, kundi pigkokonsidera pa ining sarong sakripisyo.
Diretsahan niyang ipigdoon na naghabon si Co hale sa kaban kan banwaan asin sabay na naghapot kun labing nagbaba an pamantayan kan Kongreso nganing tanggapon an siring kaining klase nin paliwanag hale sa sarong nagbutas na mambabatas.
Makusog man kaining kinondenar an pag-omaw sa pagdemitir ni Co na malinaw na suboot na halimbawa kan pagigin manhid, daing herak, hipokrito asin insulto sa dignidad asin mentalidad kan mga Pilipino.
Dugang pa ni Magalong na nadiskubre kan Independent Commission for Infrastructure na wara talagang transparency sa ghost asin substandard flood control projects asin sinabi man kaini na nakakainsulto na dae man lamang inisip kan mga kurakot an kapakanan kan banwaan.
