Isinairarom na sa state of calamity an bilog na provincia kan Masbate huli sa iwinalat na mahewasang destroso sa pangrarapado kan Bagyong Opong.
Huli digdi, tulos inaprubaran kan gabos nin provincial board members an isinunad na resolution number 164-2025 ni Board Member Homer Revil na nagdedeklara na isairarom an state of calamity sa bilog na provincia.
Pinirmahan man ini ni Governor Ricardo Kho nganing tulos na magamit an calamity fund kan provincia asin mga lokal na gobierno para sa pangangaipuhan kan mga residente na naapektaran.
Tulos man nagdara an Philippine Coast Guard (PCG) asin Department of Social Welfare and Development-Bicol Regional Office nin mga food and non-food items sa probinsya na nagkakantidad nin P22,901,952.
Nasa 486 family food packs an tulos na naibarewas sa mga residente kan Ticao Island sa banwaan kan Monreal na saro sa matinding nadestroso kan bagyo.
