LEGAZPI CITY—Naka-red alert na an bilog na pwersa kan Bureau of Fire Protection Bicol sa pagpreparar huli sa pig-aantisiparan na pagrapado kan bagyong Opong sa rehiyon.
Segun ki BFP Albay Fire Marshal Fire Superintendent Jericson Miraflor, sa intrevista kan Bombo Radyo Legazpi, preparado na an saindang mga fire station, siring man na nakapagkundusir na sinda nin inventory kan saindang mga resources asin nakahanda na man an saindang mga ekipahe na magagamit sa pagresponde.
Pig-engganyar kan opisyal an namamanwaan partikularmente an yaon sa mga landslide asin flood-prone area asin harani sa danger zone kan Bulkang Mayon, na magsunod sa mga abiso kan mga otoridad bago pa man magtama an bagyo nganing maibitaran an ano man na insidente.
Segun saiya na dae sinda matanggap nin rescue operation sa kasagsagsan kan pangrarapado nin bagyo huli sa nabubugtak man sa risk situation an saindang mga responders, alagad, case to case situation man suboot ini.
Tinawan-doon niya na bago asin pagkatapos kan bagyo sana an oras na sinda maresponde.
Mientrastanto, mensahe ni Miraflor sa publiko na magdangog sa mga otoridad kun kinakaipuhan na mag-ebakwar asin dae na magpasaway huli sa para man sana ini sa kaligtasan ninda; siring man na ipreparar an mga kagamitan asin kaharongan, asin kun namamatean na an epekto kan bagyo dapat na magtenir sa harong en kaso bako man peligroso an saindang namumugtakan.
