LEGAZPI CITY – Warang masabi an sarong political analyst sa mga miyembro kan Independent Commission for Infrastructure na binilog ni Presidente Ferdinand Marcos Jr. kun sain kabale sa mga ini sinda dating DPWH Sec. Rogelio Singson asin SGV Country Managing Partner Rossana Fajardo bilang mga commissioner mantang special adviser asin investigator si Baguio City Mayor Benjamin Magalong.
Segun ki Atty. Michael Henry Yusingco sa intrevista kan Bombo Radyo Legazpi na an mga ipigdesignar kan Presidente an mga respetado sa saindang kaniya-kaniyang larangan asin mga anti-corruption advocate.
Alagad aminado siya na dapat tawan nin executive power kan presidente an nasabing komisyon nganing mapa-otob kaini an saindang mandato na pagpapanimbag sa mga haralangkaw na pulitikong imbwelto sa mga katiwalian.
Kun pagbabasehan suboot an constitutionality kan komisyon an may nahihiling siyang mga redflags arug na sana kan dapat an dae pigpupuntirya kan imbestigasyon an proyekto kan sarong administrasyon sana na nakasaad sa ley.
Pigtaram pa kan nasabing political analyst na dapat dae man magbayolar an Independent Commission sa priciple kan separation of powers huli ta kun pagbabasehan liwat an Saligang Batas kun sain an pag-imbestiga asin pag-prosecute kan mga nangyaring korapsyon an responsibilidad kan Ombudsman bako an ibang grupo, taskforce o komisyon.
Pigladawan niya man na huli ta sakop kan imbestigasyon an mga proyekto kan nakaaging sarong dekada an nagluluwas na tutukan sana suboot an mga proyekto kan enterong Duterte administration asin sarong taon man kan Aquino administration na nagbabayolar sa kasuguan kan Korte Suprema na imbestigaran an gabos na administrasyon poon kan taong 1987.
Punto niya man na dapat warang makalusot na mga poderosong pulitiko sa magigin resulta kan imbestigasyon basado sa Executive Order 94 alagad pwedesir makalusot digdi iyo an kun ika an Presidente, Executive Secretary, Ombudsman asin an mga mismong miyembro kan komisyon.
Pagdoon man ni Yusingco na kun may magigin protektado asin salbado sa kaluluwasan kan imbestigasyon, magigin ligtas an Presidente huli ta siya an nagkrear kan komisyon asin dae dapat magin ligtas an mga department secretaries kun talagang independent an sarong Independent Commission.
