LEGAZPI CITY – Pinag-aadalan na ngonian kan House Infra Committee an masunod na lakdang manungod sa nahiling na anomalya sa flood control project na pigkaka-imbweltuhan ni Senator Jinggoy Estrada.
Ini an makalihis na ituro ni Former Department of Public Works and Highways (DPWH) Bulacan assistant district engineer Engr. Brice Hernandez na sinda Senators Jinggoy Estrada asin Joel Villanueva na nakinabang sa P955-million kantidad kan Bulacan flood control proects asin may 30 percent “SOP” o standard operating procedure.
Segun ki House Tri Committee lead Chairman Rep. Terry Ridon sa intrevista kan Bombo Radyo Legazpi na poporbaran pa nindang himayon an nagin pagbuyagyag ni Hernandez sa mga masunod na hearing alagad dae pa ninda aram kun ano an eksaktong petsa dapit digdi.
Abo niya na man patulan an pagbuyagyag ni Estrada kan grade school picture ninda ni Hernandez alagad piglinaw niya na bako niya ini kaklase asin ka-batch niya sana.
Pagdoon niya man na dae niya kaipuhan ipaliwanag an ladawan nindang duwa kan elementary kundi an importante suboot iyo an ipaliwanag niya kun ngata siya na-link ki DPWH Undersecretary Roberto Bernardo asin sa sinibak na DPWH Bulacan First District Engineer Henry Alcantara.
Pigtaram pa kan opisyal na gabos na mga kongresista asin senador an may direchos na magpaluwas nin statement alagad wara sindang direchos na mag-interpolate huli ta dae pwedesir na magbayolar sa inter-parliament policy.
Winasak man suboot ni Curlee Discaya an saiyang sinumpaang salaysay sa Senate Blue Ribbon Committee huli sa pagbabago kan saiyang affidavit kan maghampang ini sa House Blue Ribbon Committee.
Pighayag pa ni Rep. Ridon na laoman pa an mga masunod na mga resource person sa mga House Tri Committee Hearing huli ta afuera sa flood control projects an mawot man nindang masiyasat an iba pang katiwalian sa mga proyekto kan DPWH arug kan rocknetting asin slope protection.
