LEGAZPI CITY-Ipigsugo kan Sandiganbayan Sixth Division an 90-day preventive suspension laban ki Uswag Ilonggo Party-list Representative James “Jojo” Ang Jr. katakod kan kasong graft na saiyang inaatubang sa anti-graft court.
Sa irarom kan Section 13 kan Republic Act No. 3019 ( Anti-Graft and Corrupt Practices Act), an pag-sangat nin suspensyon mandatory para sa arin man na pampublikong opisyal na napapaatubang sa pormal asin awtorisadong kaso nin kurapsyon mantang nagpapadagos an paglilitis.
An kaso gikan sa 14 counts of graft na isinangat kan Office of the Ombudsman makalihis na ibuyagyag kan imbestigasyon an saiyang suboot pinansyal na interes sa mga kontrata kan Department of Public Works and Highways (DPWH) sa paagi kan saiyang estado bilang stockholder asin an saiyang relasyon sa duwang kumpanya.
Susog sa prosekusyon, an Artikulo 6, Section 14 kan 1987 Konstitusyon, estriktong nagbabawal sa mga miyembro kan Kongreso na magkapot nin direktang interes o magkua nin benepisyo sa anuman na kontrata kan gobierno sa laog kan saindang termino sa opisina.
An preventive suspension dai pigkokonsiderar na penalidad, imbes sarong legal na lakdang nganing masierto na dae pwedisir gamiton kan opisyal an saiyang posisyon ngani maimpluwensiyahan an mga testigo asin ebidensya mantang pigdadangog an kaso.
