LEGAZPI CITY – Sarong kotse ang haros marunot na makalihis ma-sandwich kan duwang truck sa boundary kan Barangay Mayon asin Barangay Villa Hermosa Daraga, Albay.
Segun ki Barangay Villa Hermosa Councilor Sarah Colinare sa intrevista kan Bombo Radyo Legazpi na kan makumpirmar niya an ekasaktong numero kan mga sakay kan kotse an tulos siyang nakipagkoordinar sa Daraga Municipal Disaster Risk Reduction and Management Office nganing tulos na ma-rescue an mga biktima.
Sa kagayunan suboot an marikas na naka-abot an mga rescue personnel sa pinangyarihan kan insidente nganing maisalbar an mga naipit na pasahero kan kotse na napag-araman na may sakay pang menor de edad.
Ipigpasalamat niya man na warang nangyaring maraot sa mga biktima asin nagsapo sana nin mga gasgas asin lugad sa saindang mga hawak.
Pigtaram pa kan opisyal na base man sa saindang pakikipag-olay sa mga nakahiling kan pangyayari an pwedesir na nawaran nin preno an saro sa mga truck na nagkawsa sa pagkaka-ipit kan kotse.
Sa presente idinara na an mga sakay kan kotse sa pinakaharaning hospital para sa pagpapabulong.
Pagirumdom man ni Colinare sa mga motorista na syertuhon na maray an kamugtakan kan saindang behikulo antes magbyahe asin magdoble ingat urog na kun may naaagihan sinda na mga road constructions.
