LEGAZPI CITY – Pigngalasan kan ofisina kan terser distrito kan Albay an nagin pagbaha sa barangay Masarawag, banwaan kan Guinobatan kan kaparehong provincia.
Segun ki 3rd District Representative Chief of Staff Dr. Cedric Daep sa intrevista kan Bombo Radyo Legazpi na dapat gabos na mga may gully an magkakaigwa kan pigtutubudang lahar flow alagad sa nasabing insidente an nangyari sana ini sa nasabing barangay.
Suhestyon niya na magsagibo nin comparative analysis nganing maaraman kun ano an kawsa asin magserbi man bilang basehan nganing magkaigwa nin tamang rekomendasyon nganing malikayan an lahar flow maski thunderstorm sana an namamatean.
Punto niya man na kun pagbabasehan an new deposits kan pagputok kan bulkang mayon, dapat suboot na kasabay an mga banwaan kan Daraga asin Camalig kun nagmobilize an mga deposits.
Pigtaram pa kan opisyal na makakatabang na an mga enot na pagbulos kan mga loose materials nganing diit na sana an ibagsak kaini sa saindang lugar enkaso rapaduhon an provincia nin bagyo.
Matabang man suboot sinda sa mga nasasakupan nindang barangay sa paagi kan training nganing magserbing preparasyon enkaso magkaigwa nin bagyo mantang dapat magsagibo nin occular inspection an Mines and Geosciences Bureau asin Philippine Institute of Volcanology and Seismology sa mga gully.
Paliwanag niya man na nakatalaan man nindang punan an training sa oras na magtao na nin schedule an mga Barangay officials huli ta saro ini sa saindang mga responsibilidad asin pagsyerto niya na nakahanda na an saiyang mga presentation materials enkaso magpoon na ini sa masunod na aldaw.
Pagdoon man ni Daep na puro na sana rekomendasyon an saiyang pigtatao huli ta wara na man ini sa hurisdiksyon kan saiyang trabaho alagad bilang former chief kan Albay Public Safety and Emergency Management Office (APSEMO) an nagtatao man siya kan saiyang kaaraman mapadapit sa disaster mitigation asin disaster risk reduction and management sa provincia asin sa enterong nacion.
