LEGAZPI CITY – Nagtutubod an sarong peace studies professor na igwa nin implekasyon sa pangkinabang katuninongan asin seguridad an ginibong pag-oolay ni US President Donald Trump asin Russian President Vlademir Putin.
Segun ki Bicol University Professor Dr. Herbert Rosana sa intrevista kan Bombo Radyo Legazpi na an nasabing pag-oolay an sarong matrayumpong lakdang para ki Putin huli ta nalikayan kaini an pagkakaigwa liwat nin sanction.
Nagluluwas man suboot na nabubugtak sa alanganin na kamugtakan an Ukraine huli ta dae nakumbinsi ni Trump an Presidente kan Russia na mag-conceed sa nangyayaring gyera sa pagultangan kan duwang nacion.
Punto niya man na magkakaigwa kuta nin matuninong na settlement an mga piggigibong lakdang ni Trump alagad dae man syerto kun magkakaigwa ini nin perpetual peace huli ta dae ini nakabase sa hustisya.
Pigtaram pa kan naunambitang professor na may mga portion kan mga pag-oolay na dae pigbuksan para sa mga media mantang suspetsya niya man na dae nagin magayon an kinaluwasan kan pag-oolay huli ta may aktibidad na na-cancel makalihis an meeting.
Para man saiya an mas magayon an mga face to face meeting kan mga lider kan manlain-laing nacion kaysa sa phone or courtesy call huli ta nahihiling an reaksyon kan kada saro asin sa face to face meeting an napipiritan na mag-commit sa sarong bagay o kasunduan.
Posible man suboot na mag-orolay si Trump, Putin, asin si Ukranian President Volodymyr Zelenskyy alagad dae ini magigin madali huli ta pwedesir na makibale man an mga delikadong estado arug na sana kan North Atlantic Treaty Organization (NATO).
Pagdoon man ni Rosana na sa mangyayaring pag-oolay man ni Trump asin Zelenskyy an dae mahahali an personal asin political interest sa peace negotiations alagad dae man ini magigin kawaran sa Estados Unidos enkaso magbago an saindang sitwasyon kan Ukraine.
