LEGAZPI CITY – Karsel an bagsak kan sarong lalaki makalihis madakop ining pigpapabakal an hinabonan na helmet asin top-box kan motorsiklo sa ciudad kan Legazpi.
Segun ki Legazpi City Police Station Public Information Officer Police Executive Master Sergeant Carlos Paña sa intrevista kan Bombo Radyo Legazpi na nangyari an insidente nin panghahabon kan Agosto 7 sa presenteng taon kun sain nawawara an helmet asin top-box kan biktima kan magpark ini sa sarong hospital sa saindang ciudad.
Tulos na nagsagibo nin imbestigasyon an otoridad makalihis makipag-koordinar an biktima sa saindang hepatura asin digdi na nanotaran na may lalaking nagpapabakal kan kaparehong nawawara sa motorsiklo kan biktima.
Kan maguno ninda an impormasyon an marikas nindang dinumanan an nasabing pagpapabakal asin naaktuhan an suspetsado na pigpapabakal ini sa Barangay Pigcale kan kaparehong ciudad.
Pigtaram pa kan opisyal na arestado an suspetsado na binistong si Alias “Win”, 44 anyos asin residente kan Barangay Cabagñan, Legazpi City na nahahampang sa pagbayolar sa Presidential Decree 1612 o an “Anti-Fencing Law”.
Dae pa man inuli sa biktima an na-recover na helmet asin top-box kan saiyang motorsiklo huli ta gigibuhon pa suboot ining ebidensya sa korte laban sa suspetsado.
Huli sa nasambitang insidente an nangapodan si Paña sa mga may kagsadiri nin mga motor o iba pang behikulo na permihang iparada an saindang mga behikulo sa maliwanag na lugar asin nahihiling sa CCTV nganing maibitaran an siring kaining insidente.
