LEGAZPI CITY – Piglinaw kan sarong progresibong grupo nag walk-out sinda sa session hall kan Senado na naka-thumbs-down sign mantang an mga senador nagpapaliwanag kan saindang mga boto sa desisyon na i-archive an impeachment case kontra ki Vice President Sara Duterte.
Segun ki Akbayan President Rafaela David sa intrevista kan Bombo Radyo Legazpi na makadismaya an nagin desisyon kan senado na imbes na pumanig sa katotohanan an garing mawot pa nindang patakason an bise sa pagkakasala kaini.
Mahihiling suboot an legal gymanastics kan mga senador sa ley nganing patakason sana sa saiyang paninimbagan an sarong government official.
Bilang saro sa mga endorser kan impeachment complaint an mawot kuta ninda na ipagpadagos an trial huli ta mawot man kan taumbayan na maaraman kun nagkasala talaga an Bise Presidente.
Sinabi pa kan Presidente kan grupo na nagmistulang ginadan kan mga senador an tyansa nganing makakuwa nin hustisya asin paninimbagan kay VP Sara huli ta mapagal na ining buhayon huli ta mayorya kan senado an may gusto na i-archived an reklamo.
Nanindugan siya na dae sinda matugot na makatakas si VP Sara sa saiyang paninimbagan maski pa suboot kakampi pa kaini an Senado asin Korte Suprema na nagdeklarang unconstitutional an impeachment complaint.
Pigdugang niya man na pakatapos mag viral an saindang thumbs down video an dae sinda tinugutan na magluwas session hall asin naghalat pa nin pirang minuto antes paulion.
Pagdoon pa ni David na bilang pilipino an habang buhay nindang magigirumduman kun siisay an 19 senador na nagdesisyon magkiling ki VP Sara asin piniling isarado an pinto pasiring sa hustisya.
