LEGAZPI CITY – Ikinadismaya kan sarong partylist group an nagin desisyon kan Senado na i-archived o i-octaba an impeachment case laban kay Vice President Sara Duterte.
Magigirumduman na sa isinagibong hearing sa senado, nakakuwa nin kabilogang boto na 19 na Senador an nagtugot na i-archive na an kaso mantang apat an nagkontra asin saro man an nag-abstain.
Segun ki ACT Teachers Party-list Representative Antonio Tinio sa intrevista kan Bombo Radyo Legazpi na bilang saro sa mga grupo na nagsunad nin impeachment complaint laban sa bise an pigkokondena ninda an pagboto kan senado asin ginamit sana an taramon na “archived” nganing i-dismissed an pagtukar sa articles of impeachment.
Nalantad man suboot sa nasabing hearing an tunay na kulay kan mga senador asin kun ano an paghiling ninda sa impeachment complaint maski wara pang trial.
Punto niya na dae nagkakahiriling na sarong lehitimong isyu an paglustay kan Bise Presidente kan P612.5M na confidential funds kun kaya dapat ining manimbag alagad pig-iisip kan mga senador politically motivated an pagbubusol kan impeachment complaint.
Ikinadagit pa kan opisyal na pirang bulan na na-delay an pagpopoon kan trial maski nagbabalgar ini sa konstitusyon asin ngonian na dae pa tapos an proseso kan korte an minadali ining tapuson kan senado.
Kun sa madaling sabi suboot mas mawot protektaran kan mayorya kan senado an bise imbes na litison ini asin patunayan kun nagkasala ini o dae.
Pagdoon man ni Tinio na importante kuta na diskutiron an nangyaring katiwalian kan Bise kan kalihim pa ini kan Department of Education huli ta dakulang kantidad an inabuso na pwedesir na kutang gamiton para sa pagpapa-uswag kan education sector.
