Sarong lalaki an nakatalagang kasuhan nin kaso sa brutal na paninigbas sa sarong babae sa Purok Masagana Uno, Barangay Pagalungan, Polomolok, South Cotabato na nagresulta sa pagkaputol kan saiyang walang takyag.
Binisto kan mga pulis an biktima na si alyas Maricar, 49 anyos, mantang an suspek iyo si alyas Mario, nasa legal na edad, residente kan Glan, Probinsya nin Sarangani, asin tugang kan live-in partner kan biktima.
Base sa imbestigasyon kan Polomolok Municipal Police Station, napag-araman na nangyari an insidente pasado alas 11 nin banggi kan Lunes, Hulyo 28, 2025, mantang nag-iinuman an tulo.
Naghale nin kadikit na oras si alyas Don, an live-in partner kan victima nganing magbakal nin sigarilyo.
Pagbalik kaini, nadukayan kaini si Maricar na nagkakarigus na sa sadiring dugo asin nakikimaherak nin tabang makalihis na tigbason kan suspetsado.
Tulos man na dinara sa ospital an biktima, mantang si Mario marikas man na nagdulag lunad kan motorsiklo ni Don pasiring sa dae pa nasabing lugar.
Segun sa biktima, dati nang nagkaiwal sinda kan suspetsado alagad dae niya piglalaoman na magigin paninigbas na an kakahantungan.
Padagos pa siyang nagpaparahay sa Polomolok General Hospital.
Segun ki Police Lt. Col. Harold Cornel, hepe kan Polomolok PNP, pormal nindang isasangat an kaso kontra ki alyas Mario na padagos pang pighahanap kan mga awtoridad.
