LEGAZPI CITY – May mga mawot man madangog sa ika-apat State of the Nation Address ni President Ferdinand Marcos Jr. an mga grupo nin mga parasisira sa rehiyon Bicol.
Segun ki Tony Dollente kan grupong Lambat Bicol sa intrevista kan Bombo Radyo Legazpi na problemado sinda huli sa mga ordinansang ipina-otob kan administrasyon na naglilimita sainda sa 10 kilometro na municipal fishing ground.
Nagin diit na sana suboot an saindang mga aldawang dakop huli ta kaipuhan pa nindang mag-aragawan sa kadiit na espasyo kan makukuwaan nin sira.
Nakadugang man sa saindang problema an ipigsasagibong mga coastal roads na nagigin kawsa kan pagka-dislocate kan mga saradit na parasisira na nagigin resulta kan paghanap kan mga ini nin ibang trabaho.
Pangapodan pa kaini na dapat magin bukas an mga ini sa plano ninda sa sarong munisipyo nganing makapagtao man sinda nin suhestyon nganing dae man sinda maipit sa saindang mga programa.
Aminado siya na huli sa saiyang edad an napapagalan na siya maggamit nin computer na kaipuhan kuta para sa pagpapa-accredit ninda sa mga organisasyon asin benipisyo kan saindang sektor.
Nagtutubod man siya na dae sinda kabale sa mga programa kan gobierno huli ta wara sinda nin access sa mga government offices nganing makahagad man kuta nin ayuda.
Mensahe niya sa mga parasisira na sana magin organisado an saindang sektor nganing mabisto an saindang lado sa ciudad, sa rehiyon man o maski sa enterong nacion.
