LEGAZPI CITY—Nakumpiskar sa sarong indibidwal an nasa P1,360,000 na kantidad nin pigtutubudang shabu sa ikinundusir na buy-bust operation kan Biyernes, Hulyo 11, sa Zone 4 Barangay Bulusan, Libon, Albay.
Naarestar an suspek huli sa pinagsarong operatiba kan Libon Municipal Police Station, Regional Police Drug Enforcement Unit 5, asin Provincial Intelligence Unit Albay Police Provincial Office.
Binisto an lalaki na sarong 37-anyos, may agom, sarong delivery rider asin residente kan Barangay East Washington Drive, Legazpi City, Albay.
Naarestar an suspek makalihis na magpabakal nin sarong knot tied plastic bag na may laog na 50 gramos nin pigtutubudang shabu na may kantidad na P340,000 sa sarong police poseur buyer karibay kan buy-bust money na sarong pidaso nin genuine P500 bill na nakapatong sa manlaen-laeng denominasyon nin boodle money na may kabilogang kantidad na P97,500.
Makalihis an body search asin paghalughog sa bag kan suspek, nakumpiskar man digdi an sarong pidaso nin knot-tied transparent plastic bag na may laog nin pigtutubudang shabu na may gabat na labi 150 gramos asin may kantidad na P1,020,000.
Sumatotal, pigkarkulong nasa kabilogang gabat nin 200 gramos na may kabilogang kantidad na P1,360,000 an nakumpiska gikan sa suspek.
Mientrastanto, nasa kustodiya na kan Libon MPS an suspek asin mahahampang sa kasong pagbalgar sa Republic Act 9165 o ang Comprehensive Dangerous Drugs Act of 2002.
