LEGAZPI CITY-Nadiskubre liwat sa San Jose del Monte City, Bulacan an panibagong dumpsite kan mga ataman na hayop kan Lunes, sa tahaw kan imbestigasyon sa kontrobersiya sa pet crematorium asin aftercare services.
Ini an pantulong dumpsite na nahiling poon kan maaraman an isyu mapadapit sa mga labi kan mga ataman na hayop sa pet crematorium ngani kuta ma-cremate, alagad idinispose sana ini sa nasabing lugar.
Nadiskubre man ini kan animal welfare group na “Luna and Furry Siblings” na siyang enot na nakahiling sa mga dumping site katakod kan insidente kun sain nakatambad sa sarong lote an mga labi kaini kan Biyernes, kan nakalihis na semana.
Susog sa saindang panibagong post, nahiling sa sarong septic tank sa Brgy. Minuyan IV sa San Jose del Monte City an suboot mga labi kan ataman na ayam na nakasilid sa mga sako.
Tumambad man ini sa Brgy. Minuyan Proper kun sain nadukayan an 29 na labi kan mga ataman na ayam asin ikos
Pito hasta sa walong sako suboot na nabubulok na an nahiling asin narekober kan mga otoridad.
Sa ibong kaini, susog kay Bacoor City Mayor Strike Revilla, dae na suboot nakikipagtabangan sa imbestigasyon an may sadiri kan pet crematorium na tulos na ipinasardo kan gobierno kan Sabado.
Dagdag pa kaini, dae mapundo sinda sa pagsangat nin kaso sa mga imbuelto sa nasabing isyu.
“Inatasan na rin ang paghahanda ng mga regulasyon para sa pet crematorium at pet cemetery sa Bacoor upang magkaroon ng malinaw na pamantayan at mas mahigpit na pagbabantay,” sinabi kan alkalde.
Dagdag pa ni Revilla, “Target din nating magkaroon ng sariling pet crematorium ang Pamahalaang Lungsod ng Bacoor upang makapagbigay ng maayos, mapagkakatiwalaan, at abot-kayang serbisyo para sa ating mga fur babies.”
