LEGAZPI CITY – Nanindugan an grupo nin mga tsuper na sa haros duwang magkasunod na semanang rollback an nagtetenir na halangkaw an presyuhan kan mga kompanya kan langis kompara sa presyuhan sa world market.
Segun ki Pagkakaisa ng mga Samahan ng Tsuper at Operator Nationwide (PISTON) President Mody Floranda sa intrevista kan Bombo Radyo Legazpi na nagkakaigwa nin dakulang tubo an mga kompanya huli ta babakalon ninda an langis sa world market sa hibabang kantidad asin ipapabakal ninda ini sa halangkaw na presyo.
Maski nagbababa an presyo kaini ngonian an nagtetenir man liwat na dakula an ganansya kan mga kompanya huli ta kun susumahon nagkawat na sa P12.20 an itinaas kan mga kompanya sa presyo kan mga produktong petrolyo kan nakaaging mga semana.
Sa hiling niya man an nagkakaigwa nin hoarding sa produktong petrolyo huli ta kadaklan suboot sa mga ini an may itinagong stock asin ipinaluwas sanang ubos na an saindang supply pirang mga oras sagkod ipinaotob kan nakaaging bulan an bigtime oil price hike.
Pigtaram pa kaini na nagtetenir na dakula sa presente an kantidad kan ganansya na nawawara sa mga public utility jeepney driver na nagagamit na kuta sa saindang urualdaw na pangangaipuhan maski nagbaba an presyo kan mga gasolina asin krudo.
Sa ibong kaini an nagpapadagos an trabaho kan saindang pag-iriba afuera sa magkaigwa nin ganansya kundi makatao nin serbisyo sa mga mananakay na urualdaw na naglalaom sa sainda.
Punto niya man na dapat tanggalon na an buwis sa mga produktong petrolyo huli ta dae man ini nakatabang sa sainda asin nganing dae man ma-ipasa sa mga commuter an gabat kan halangkaw na presyo kan mga ini.
Nagtutubod si Floranda na dapat makasabay an pagrebisa kan excise tax sa produktong petrolyo asin iba pang buwis sa mga priority na maipasa tulos sa 20th congress huli ta digdi nakasalalay an kabuhayan bako sana kan mga driver kundi pati man an namamanwaan.
