LEGAZPI CITY – Tahasang pigtuga kan Police Regional Office 5 na uminabot sa 700 na mga kapulisan sa rehiyon bikol an nagtetenir na mataba o overweight.
Alagad paliwanag ni Police Regional Office 5 Regional Director Police Brigadier General Andre Dizon sa intrevista kan Bombo Radyo Legazpi na siring kan mandato ni PNP chief Torre an mawot man nindang tutukan an pagbabawas nin timbang kan saindang mga personahe.
Katakod kaini an nagpoon na suboot an saindang Police calisthenics o su pig aapod na “Pulisteniks” kun sain nagsasagibo nin ehersisyo an mga police personnel nganing mapakarhay an saindang disiplina, pagkabaskog, asin pagkasararo.
Nagkapira man sa mga pigkokonsiderang matataba sa saindang hanay an nagsasadiri nin pagbabawas nin timbang tuyong dayoff kan mga ini arug kan pag-jogging.
Piglalaoman man kan opisyal na pag-abot kan bulan nin disyembre an mabalik an mga ini sa mga required na timbang kan sarong polisya.
Pagirumdom ni Dizon sa mga kapulisan sa rehiyon Bikol na magsunod asin maki-kooperar sa kasuguan kan saindang mga commander nganing malikayan an pagkakatanggal sa pwesto huli sana sa pagigin overweight.
