LEGAZPI CITY-Binaha an Barangay Poblacion sa Mobo Masbate huli sa padagos na pag-uran asin high tide sa lugar.
Segun kay Mary Ann Onsing kan Barangay Disaster Risk Reduction and Management Committee Action Officer kan Barangay Poblacion Mobo Masbate, sa intrevista kan Bombo Radyo Legazpi, dara ini kan padagos na paguran na uminabot sa 79 na porsiyento asin nagsabat man sa high tide sa nasambitang lugar.
Mas malala suboot an nadanas na baha sa mismong ciudad kan Masbate na nagresulta kan pagkalubog kan mga tinampo asin eskwelahan sa lugar.
Naghaloy suboot an baha nin saro may kabanga na oras asin nadifisilan an mga barangay officials sa pagresponde.
Apektado man kan baha an mga eskwelahan asin residential na mga harong sa mga hibabang parte kan lugar.
Nagsuspende man suboot an mga eskwelahan nin klase huli sa nasambitang pagbaha.
Sinabi ni Onsing na pigpaplanuhan an pagpupursige kan mga budget para sa maintenance kan mga kanal na iyo an nagkakawsa nin pagbaha sa lugar, ngani dai namaranasan ini sa masunod na panahon.
Nagtao man nin tabang an Department of Social Welfare and Development (DSWD) asin Local Government Unit (LGU) kan ciudad sa mga nag-ebakwar na nasa shelter.
Pagirumdom man kan opisyal na dapat dai suboot paghidalion an mga proyekto ngani maitama an mga drainages para maibitaran an baha.
