LEGAZPI CITY-Nagpaluwas nin anunsyo an Embahada kan Pilipinas sa Washington mapadapit sa mga salang impormasyon na naglalakop sa social media na nagsasabing igwa nin bagong mga restriksyon an Estados Unidos laban sa mga dual citizens asin green card holders.
Susog sa embahada, wara nin pagbabago sa mga polisiya kan Estados Unidos manungod sa dual citizenship o sa mga direchos kan mga legal na permanenteng residente.
Inaabisuhan an mga Pilipino na dai magdesisyon sa solo sana, siring kan pagpapawalang-bisa kan saindnag Philippine citizenship, base sana sa mga dai beripikadong impormasyon hale sa social media.
Nangapudan man an embahada sa komunidad kan mga Pilipino sa Estados Unidos na siertohon na hale sana sa mga opisyal na sources kan gobierno an saindang makukuang impormasyon asin likayan an paghiras nin sala o dai beripikadong content.
