LEGAZPI CITY—Nasulo an sarong top-down tricycle mantang yaon ini sa tahaw kan tinampo sa Sitio Baribag, Brgy. Bibincahan, Sorsogon City.
Segun ki Bureau of Fire Protection Sorsogon City Chief-Intelligence and Investigation Unit Senior Fire Officer 2 Aida Buenaobra, sa intrevista kan Bombo Radyo Legazpi, tulos nindang narespondehan an insidente makalihis na may mag-report sa saindang opisina.
Basado sa saindang inisyal na imbestigasyon na may kalumaan na an nasabing behikulo kaya saro ini sa saindang pighihiling na anggulo kun nata nasulo ini.
Susog man sa salaysay kan driver kan nasabing tricycle na raot na an mga wiring kaini huli sa kalumaan na man kan behikulo.
Segun sa driver na nag-apply siya nin preno sa tricycle huli ta nasa intersection na parte kan Sitio Baribag, alagad kan papadalagan na giraray kuta an saiyang behikulo narisa kaini na nagkakalayo na an tricycle.
Wara man na ibang indibidwal an nadamay alagad an driver nagsapo nin diit na rungas sa walang parte kan bitis huli sa insidente.
Mientrastanto, pagiromdom kan opisyal sa mga motorista na iobserbar an proper maintenance kan saindang mga behikulo nganing maibitaran an mga insidente siring kan kasulo.
