Inasigurar kan National Bureau of Investigation (NBI) na bantay sarado suboot ninda an nakakulong ngonian sa saindang detention facility sa cuidad kan Muntinlupa na si former Congressman Arnolfo ‘Arnie’ Teves Jr.
Ini an nagin pagsyerto kan nasabing kawanihan mapadapit sa orolay kan seguridad asin pagbabantay sa nasabing akusado na imbwelto sa mga kasong magagabat na may kinaaraman urog na sa paggadan.
Kinumpirmar mismo kan presenteng direktor kan National Bureau of Investigation na si Retired Judge Jaime B. Santiago na saindang mahigpit na pigbabantayan an dating kongresista mantang nasa saindang pang pangangataman.
Kun saen naka-monitor man an mga personahes kaini 24 oras, masyerto sana an seguridad nganing malikayan an mga bako kanais-nais na posibleng maganap o mangyari.
Alagas siring man, sa ibong kan mga paghihigpit, pig-asigurar man kan nasabing direktor kan kawanihan na irerespeto kaini an mga direchos kan nakakulong na dating kongresista.
Direktiba niya suboot ini sa saiyang mga personahes na ingatan, asin proteksyunan nganing dae maka-eksperyensya nin pangungulog sa laog kan saindang detention facility.
Mientrastanto, kawsa man kan iniluwas na ‘commitment order’ kan Manila Regional Trial Court Branch 12 na ilipat an dating kongresista sa Manila City Jail, mahigot mang pinanindugan kan saiyang kampo an isinunad nindang nindang mosyon sa korte.
Pagdoon kaya kan abogadong si Atty. Ferdinand Topacio na igwang ‘security concern’ o kahandalan sa seguridad kan buhay kan dating kongresista kun kaya tutol suboot sinda sa kasuguang mailipat ini nin kustodiya.
Kun kaya saro pang utro pa nindang papaninindugan suboot an saindang ‘motion for reconsideration’ sa korte nganing mamantenir na sana si former Congressman Arnie Teves Jr. sa detention facility kan National Bureau of Investigation sa ciudad kan Muntinlupa.
An nasabing dating kongresista an nahahampang sa mga patung-patong na kasong isinunad sa magkakasuway na korte sa nacion.
Kun saen pigkakahampang kaini an mga kasong may kinaarman sa illegal possession of explosives, illegal possession of firearms asin iba pa.
Imbwelto man siya sa kasong paggadan huli sa pigtuturo suboot ining ‘mastermind’ sa likod ng paggadan kay dating Negros Oriental Governor Roel Degamo.
 has assured that former Congressman Arnolfo 'Arnie' Teves Jr. is currently being held at their detention facility in Muntinlupa City.){kind=link}