LEGAZPI CITY—Nairehistro an sarong banggaan nin sarong delivery truck asin SUV sa hampang kan Mercedes Fire Station sa Barangay Mercedes, Pilar, Sorsogon.
Segun ki Pilar Fire Substation Shift Commander Senior Fire Officer 1 Jose Chester Pangilinan, sa intrevista kan Bombo Radyo Legazpi, na bigla na sana nindang nadangog an makusog na tanog nin banggaan sa luwas kan saindang opisina kaya tulos man ninda ining pigberipika asin pigrespondehan.
Segun sa opisyal na haros mayupi an enotang parte kan kotse mantang nagkaigwa man nin danyos an likod na parte kan truck.
Wara man suboot na nairidong mga indibidwal sa nasambitang banggaan.
Sa presente, natangkas na an duwang behikulo sa tinampo nganing dae na ini magkawsa nin magabat na trapiko sa lugar.
Nalinigan na man suboot an nagtagas na krudo sa tinampo ngani man na dae na ini magkawsa nin kasulo.
Padagos man an imbestigasyon kan mga otoridad sa nasambitang insidente.
Mientrastanto, abiso man ni Pangilinan sa mga drayber na ugalion na pagreparuhon an saindang mga behikulo bago magbiyahe siring man an pagsunod sa mga batas-trapiko nganing maibitaran an siring na aksidente.
